المقالة(4) سائر و لكن الى اين المسير؟

عندما نقرر اننا نريد الخروج من المنزل ومقابلة الأصدقاء فانك تقوم بالتخطيط الجيد لهذا الخروج:

1-تقوم بالإتصال بالأصدقاء لتعرف من لديه نفس الرغبة فى الخروج

2-تحددون مكان المقابلة ووقتها.

3-ثم تحدد ما الذى سوف ترتديه لتعرف هل هو مكوى ام سوف تكويه.

4-تحديد الوقت الذى يجب ان تخرج فيه من البيت للوصول فى الوقت المتفق عليه.

5-على اساس هذا الوقت تقوم بتحديد الوقت المناسب لإرتداء ملابسك.

انظر فانت قد عرفت ماذا تريد اليوم و قمت بالتخطيط لذلك جيدا فهل انت تعرف ما الذى تريده فى هذه الحياة و كيفية الوصول اليه .


من الآخر يعنى هل لديك هدف فى الحياة؟

لماذا لا يقوم الناس بتحديد أهدافهم فى الحياة ؟

لماذا نخشى الجلوس امام ورقة بيضاء لكتابة ماذا نريد( ده لو احنا عرفين ماذا نريد اصلا )وتحديد الخطوات للوصول اليه؟

-ان الله سبحانه وتعالى يؤكد لنا أهمية النظر الى المستقبل بقوله (ولتنظر نفس ما قدمت لغد).

اننا دائما نخرج من بيوتنا ونحن نعلم تماما الى اين ذاهبين ولكننا نسير فى الحياة دون معرفة الى اين .

كلنا نعلم ان هناك جنة ونار وكلنا نريد الجنة هل قمت بالتخطيط للوصول اليها ؟

هل تعرف كيف ترضى الله سبحانه وتعالى ؟

رضى الله يتحقق فى طاعته،وقد امرنا الله بالعبادة وتعمير الأرض أي الرقى بالمجتمعات ولكي ترقى المجتمعات يجب على كل فرد فيها ان يسعى وراء رقى ذاته ولا يمكن ان ترقى بذاتك الا من خلال تحديد الأهداف و التخطيط للوصول اليها وجعل دائما فى ذهنك ان هدفك الأساسي هو رضى الله عليك فيجب أن تكون اهدافك الفرعية اهداف تساعدك للوصول الى الهدف الأساسي .

فيجب ان لا يكون هدفك يحتوى على معصية لله او انك تقوم بامور ملتويه للوصول اليه فمثل هذه الأهداف لا تحقق اي رقى ولا يكون لها اهميه لانها لم تبنى على رضى الله .

فيجب ان يكون الدافع الأساسي لهدفك هو رضى الله كما يجب ان يكون له فائدة للمجتمع.

أهمية الأهداف:

1-التحكم أكثر فى حياتك و مصيرك. 2-الثقة فى النفس.

3-رقى الذات. 4- ادارة الوقت وتنظيم الأولويات.

5-الكسب المادي :فالذى يملك اهداف و يقوم بكتابتها ويخطط ليصل اليها يكسب اكثر بكثير من الذى ليس له اهداف او لديه ولكن لا يقوم بكتابتها.و فى هذا الشأن أجرت أحدى الجامعات بحث لإكتشاف منهجية النجاح لدى خريجي ادارة الأعمال الذين تخرجوا من عشر سنوات فوجدت أن 83% منهم ليس لديهم أهداف على الأطلاق فهم يعيشوا لكسب رزقهم المحدود الذى يعينهم ليعيشوا حياة كريمة ،و14% لديهم اهداف فى اذهانهم ولكن لم يقوموا بكتابة هذه الاهداف فهؤلاء يكسبون 3 أضعاف المجموعة الأولى،و3%لديهم أهداف واضحة و قاموا بكتابتها ووضعوا الخطط لتنفيذها فهم يكسبون 10 أضعاف المجموعة الأولى.(ففى اي مجموعة تحب ان تكون )

يبقى لدينا جزء مهم هو كيفية تحديد الأهداف لأن فى كثير منا مش عارف ايه هي أهدافه و فى ناس تعرف أهدافها ولكن

مش عرفه تحققها وده الى هنعرفه فى المقالة الخامسة ان شاء الله.

المقالة (3)قوة التحكم فى الذات

بعد ما عرفنا ايه هو العقل الباطن و قوانينه وما هى البرمجة اللغوية العصبية التى تسعى الى مساعدة الانسان فى ايجاد طريق السعادة الذى سيوصلك فيما بعد الى النجاح عن طريق تعريفك ما هو عقلك و كيفية التعامل معه.

(قوة التحكم فى الذات)

* التحدث مع الذات:

للأسف الشديد 80% من الأشارات التى ترسل الى العقل الباطن سواء عن طريق ما نقوله نحن لانفسنا او ما يقوله الأخرين الينا تكون اشارات سلبية.

ما هى الأشارات السلبية؟

1-كلمات مثل( انا خجول- انا ضعيف الشخصية-شكلى غير جذاب) وغيرها من الكلمات السلبيه.

2-كلمة لكن(أريد ان أستيقظ مبكرا و لكن لا أحب ذلك) عندما تقول مثل هذه الجملة فانها تحتوى على شق ايجابى و هى الجملة الأولى ولكنك عند قول كلمة لكن فقد الغيت هذه الاشارة الايجابية وكأنك ارسلت الى العقل الباطن هذه الجملة(لا احب أن أستيقظ مبكرا) انظر ماذا فعلت كلمة لكن فاحذر من قولها.

ما هى الاشارات الايجاببية؟

(انا استطيع ان أحقق اهدافى- انا انسان قوى - انا استطيع ان استيقظ مبكرا) و هكذا.

* أشكال التحدث مع الذات :

1- الفكر:بمعنى ان تقول مثل هذه الاشارات السلبية التى اوضحناها دون الجهر بها ولكن عن طرية التفكير (فعندما تنظر فى المرآه و تكون غير راضى عن نفسك فتقول فى داخلك ان شكلك غير جذاب فقد قام العقل الباطن بتخذينها على الرغم من انك لم تنطق بهاو عندما يخذنها العقل الباطن فانك دائما سوف ترى نفسك كذلك و سوف يراك الاخرين كما ترى انت نفسك.

2- الحوار مع النفس : ان تتكلم بالجهر ولكن مع نفسك ( فنفرض انك كنت فى جدال حول موضوع معين مع شخص ما وبعد الانتهاء من هذا الجدال وبقيت بمفردك فجلست تعيد شريط الجدال ولكن مع نفسك وتقول كنت المفروض اقول كذا ولا اقول كذا ) فهذه العملية ترهق العقل الباطن كثيرا كما انها غالبا ما تحتوى على اشارات سلبية كثيرة.

3- الجهر بالقول:فعندما يجلس الاصدقاء و يشكو كل واحد من حاله الى الاخر فيقول انا عندى اكتئاب- انا مضايق- انا مش سعيد و هكذا وتكون الجلسة عبارة عن مجموعة من الاشارات السلبية ولكن كنت تعتقد انك ذاهب للقاء أصحابك للترفيه عن نفسك فانظر ماذا فعلت فى نفسك فسوف تصل فعلا الى حالة الأكتئاب وسوف تصاب بالضيق من أبسط الأشياء.

يقول سيدنا محمد صلى الله عليه وسلم (لا يحقرن أحدكم نفسه)

ويقول أحد العلماء( أنت اليوم حيث أوصلتك أفكارك وستكون غدا حيث تأخذك أفكارك)

*كيف نبدأ بارسال الاشارات الايجابية للعقل الباطن و محو الاشارات السلبية السابقة:

(برمجة العقل الباطن)

1- القواعد الخمسة:

-ان تكون رسالة ايجابية.

-ان تكون الرسالة واضحة و محددة.

-تدل على الوقت الحاضر.

-يصاحب الرسالة أحساس قوى بمضمونها.

-تكرار الرسالة عدة مرات.

*فعندما تريد ان تستيفظ مبكرافى ساعة معينة ما هى الرسالة ؟ فأنك ستقول الآتى(أنا استيقظ الساعة التاسعة) ولا تقول (أنا سوف أستيقظ الساعة التاسعة)

.

*ابدا من اليوم واحذر ماذا تقول لنفسك ،و ما الذى تقوله للأخرين ،و احذر ماذا يقوله الاخرين لك ،و اذا لاحظت ان هناك رسالة سلبية قم بالغائها فورا( بأن تقول الغى وقم بأستبدالها برسالة ايجابية).

2-الاعتقاد: كل عقل بشرى لديه مجموعة من الاعتقادات التى تتحكم فى تصرفاته(سلوكه) كيف تكونت؟

اى اعتقاد تكون عن طريق مجموعة من الاشارات المتشابه التى تم ارسالها الى العقل الباطن والذى قام بدوره بتكرارها حتى تكون هذا الأعتقاد.

فاذا كانت الاشارات ايجابيه سيكون الاعتقاد ايجابى و بالتالى سيكون سلوكك الذى نتج عن هذا الاعتقاد ايجابى ايضا(و العكس صحيح)

(السلوك هو ثمرة الاعتقاد)

يقول د. روبرت شولز

يمكنك ان تعمل فقط ما تعتقد انك تستطيع عمله، يمكنك فقط أن تكون من تعتقد أنك تكونه، ويمكنك ان تحصل فقط على ما تعتقد أنك قادرا على الحصول عليه.

3-تفادى سلبيات خمس لتكون لديك نظرة سليمة للحياة:

(اللوم - المقارنة - العيش فى الماضى -النقد -ظاهرة الأنا)

-لا تقارن نفسك باحد ستكون دائما انت الأقل اى الخاسر فى هذه المقارنة و لكن قارن نفسك بما انت عليه الآن وما كنت عليه سابقا.

-هناك مقوله تقول تكلم عن نفسك سيسمع الاخرين وتكلم عنهم ومدحهم سيسمعونك و ستكسب حبهم لك.

(ونكمل فيما بعد)

المقالة (2) قوانين العقل الباطن

يقول د.الفقى ان للعقل الباطن* 276* قانونا وتقوم هذه القوانين بتحديد طريقة تعامل الشخص مع عقله من ثم تطويعه لتحقيق أهدافه.
أنا هقولكم منها اهم القوانين:
1-قانون الأنجذاب: بمعنى ان اى حاجه تفكر فيها تنجذب اليك ومن نفس النوع،فان كنت تفكر فى شىء ايجابى فسوف يحدث لك فعلا والعكس صحيح فمن منا كان فى احد الأيام يفكر فى شخص ما ثم قابله بالفعل حتى وان لم يكن قابله منذ سنين ،او عندما تكون جالسا ويأتى على بالك احد ما فتقول هل ياترى هو فاكرنى زى ما انا فكره؟ نعم هو بيفكر فيك ايضا فقانون الانجذاب هذا وهو من اخطر القوانين يقول ان الطاقة البشرية لا تعرف مسافات ولا أزمنة ولا أماكن فعندما قمت بالتفكير فى شخص ما فان طاقتك وصلت اليه وسوف ترجع لك ومن نفس النوع.انا عن نفسى حصلى كتير انى قلت هتصل بوحده صحبتى وبعدين حاجه شغلتنى وما تصلتش و بعد شويه التيليفون يرن وتكون صحبتى ألى كنت هتصل بيها وبقولها انى كنت لسه هتصل بيكى فتقول جملة مشهوره اوى (القلوب عند بعضها).
2-قانون التركيز: اى شىء تركز عليه سوف يحدث لك بالفعل فان ركزت على التعاسة فسوف تشعر بمشاعر و احاسيس سلبية و سوف تصادف جميع المواقف التى تسبب لك التعاسة و العكس صحيح ان ركزت على السعاده.
3-قانون التوقع: وايضا هو قانون قوى جدا ويقول أن أى شىء تتوقعه و تضع معه شعورك و أحاسيسك سوف يحدث فى عالمك الخارجى.
فمثلا كثيرا ما يتوقع أشخاص انهم اذا ركبوا سياراتهم انها لن تعمل و بالفعل حين يركبونها ويحاولوا تشغيلها لا تعمل(فانتبه لما تتوقع وحاول دائما ان تتوقع الخير).
عرفين الكلام ده موجود فى القرآن فقد قال الله تعالى (انى على ظن عبدى بى) و قال سيدنا محمد عليه افضل الصلاة و السلام(بشروا ولا تنفروا).
4-قانون العادات:ان ما نكرره يتراكم يوم بعد يوم حتى يصبح عادة دائمة.فمثلا لكى تصبح عندك صلاة الفجر عادة دائمة فيجب ان تجاهد لتستيقظ يوم بعد يوم فى وقت صلاة الفجر فى بادء الامر سيكون صعبا ولكن مع تكرار الأستيقاظ ايام متتالية سوف تستيقظ لصلاة الفجر ودون اى معاناه.(واحد العلماء يقول لكى يصبح اى شىء عادة يجب تكراره من 6 الى 21 مرة او يوم).
كما ان هناك ايضا تصرفات غريبة للعقل الباطن :
لو قيلت لك هذه العبارة(لا تفكر فى حصان اسود)ولكن انت بالفعل ستكون فكرت فى حصان اسود لأن العقل دائما يحذف كلمة لا و ياخذ العبارة التى بعدها.
لذلك عندما تريد ان تنهى طفل عن فعل معين فلا تقول له (لا تلعب بالكرة)فانت الان كانك قلت له ألعب بالكرة لأن العقل يحذف كلمت لا فممكن ان تقول له باسلوب مرن( اترك الكرة).
وكده أكون خلصت القوانين ألى عايزه اقولها.

(والى اللقاء فى المقالة التالية)

العقل البشرى(البرمجة اللغوية العصبية)

انا عرفه أنى اتأخرت عليكوا كتير اوى اصل كان فى شوية حاجات شغلانى من ضمنهم موضوع (البرمجة اللغوية العصبية)ألى أكيد فى ناس كتير سمعوا عنوا و عن المحاضر المعروف د.ابراهيم الفقى و بدأت أقرا عن الموضوع ده على النت عرفين من امتى من آخر موضوع كتبته لما كنت بدور على معنى السعادة وقرأت مقالة د. لابراهيم الفقى بيتكلم فيها عن السعادة.

فلسفة د.ابراهيم الفقى للسعادة:

1-لا يوجد انسان تعيس ولكن توجد افكار تسبب الشعور بالسعادة.

2-ان لم تكن سعيدا داخليا لن تكون سعيدا خارجيا .

3-ان لم تكن سعيدا بما انت عليه الآن لن تكون سعيدا عندما تصبح ما تريد.

4-لو نظرت حولك وعرفت حقيقة من انت لن تستطيع ان تكون غير سعيدا.

واخيرا لا يوجد طريق للسعادة لأنها هى الطريق وأن السعادة الحقيقية تكمن فى حب الله تعالى ورسوله

(كما ان البعض يظن ان الشعور بالسعادة هو نتيجة للنجاح ولكن العكس هو الصحيح اى ان النجاح هو نتيجة الشعور بالسعادة )

وده صح عشان لما بنكون سعداء بنكون قادرين على العمل بجد و ابداع و بالتالى تحقيق النجاح يعنى مش هنقدر نحقق اى نجاح لو ماكناش

نقدر نجلب افكار تسبب الشعور بالسعادة.

طبعا احنا مش هنخلص موضوع البرمجة اللغوية العصبية فى قعدة واحدة لا لازم هنقعد مع بعض كتيييرو يارب اعرف اضيفلكم اى معلومة على معلوماتكم و تستفيدوا من الكلام الى هكتبه.

(العقل البشرى)

يتكون العقل البشرى من جزأين هما العقل الواعى و اللاواعى:

1-العقل الواعى:هو ذلك الجزء الذى يفهم و يعى الاشياء عن طريق المنطق ويدرك السبب و النتيجة فهو الذى يقوم باستقبال الافكار عن الحواس الخمسة السمع و البصر و التذوق و الشم واللمس و يقوم العقل الواعى بقبول هذه الأفكار او رفضها ففى حالة القبول وبعد التركيز عليها ياتى دور العقل الباطن.

2-العقل اللاواعى:يقوم بتخزين الافكار التى ارسلت له عن طريق العقل الواعى و عن طريق هذه الافكار التى تم تخزينها منذ كنت جنين فى بطن امك حت هذه اللحظة كون ما يسمى بالمعتقدات التى تختلف بالطبع من انسان الى اخر على حسب المدخلات (الافكار)التى سينتج عنها المخرجات(السلوك و الطباع) .

و عليه فان اى فكرة او هدف يبقى ناشطا فى العقل الواعى سوف يحققه العقل الباطن (اللاواعى) سواء كان فى صالحنا او ضدنا0

يقول أحد العلماء:

راقب افكارك لأنها ستصبح افعالا

راقب افعالك لأنها ستصبح عادات

راقب عاداتك لانها ستصبح طباعا

راقب طباعك لانها ستحدد مصيرك

ما هى البرمجة اللغوية العصبية؟

نفترض انك ادركت سلوك سيىء صدر منك فى احد المواقف هل يمكنك ان تغير هذا السلوك عند تعرضك لنفس الموقف او مواقف مشابهة؟ وكيف؟

هنا ياتى دور علم البرمجة اللغوية العصبية الذى يقوم ببرمجة العقل الباطن(اى أستبدال الأفكار السلبية التى كونت الاعتقاد الذى نتج عنه هذا السلوك السيىء بافكار ايجابية) فحين تعرضك لموقف مشابه سيتغير سلوكك الى السلوك ايجابى.

بالطبع سوف نتناول كيفية الاستفاده من هذا العلم بالتفصيل ولكن اولا يجب التعرف على ما يسمى بقوانين العقل الباطن.

(غدا ان شاء الله)

بلا عنوان

فكرت كتييييييييييير أيه العنوان المناسب للى هكتبه معرفتش أكتب اه و كان عندى كذا عنوان فى دماغى بس معرفش مين احسن واحد (يوم من أيامى ولا صحيت الصبح ولا الساعة 12 الظهر) هتقولى اشمعنا 12 هقول اصل للأسف بصحى الساعة 12 ،المهم انى فى الاخر كتبت فى مساحة العنوان بلا عنوان.
صحيت الصبح اه اقصد الظهر و صحيت سيف ابنى وقالى بصوته الجميل صباح الخير يامامى المهم نزلنا من على السرير و فتحنا شباك الأوضة ووضبنا السرير ،طبعا مش بتكلم بصيغة المفرد لأن ابنى لازم يحط أيده فكل حاجه ، و صلينا الصبح و الظهر للاسف مش بصلى الصبح فى ميعاده عرفين طبعا اه ميعاده مش الساعة 10 ولا 8 ميعاده بيكون قبل طلوع الشمس حولت أكثر من مرة أعود نفسى اصحى الفجر بس لحد النهارده معرفتش اعود نفسى.
و بعد كده عملت مج نسكافيه و قعدت على النت عشان اشوف مدونتى و كالعادة مفيش حد لسه أتكعبل فيها وجه فى بالى أبص على مدونات التلت بنات ألى كانوا فى العاشرة مساءا (رحاب و غادة وغادة) أصل ألى حصل معاهم والله العظيم كان حلم يقظة حلمته أول ما سمعت عن موضوع المدونات ألى سمعت عنه فى برنامج شبابيك وان كل واحد يقدر يكتب كل ألى عاوزه وان الناس ممكن تقرأله و ترد عليه و فى اللحظه ده سرحت وتخيلت نفسى عملت مدونه وناس كتير اعجبت بيها لدرجة أنهم دعونى لبرنامج والله كان برده برنامج العاشرة مساءا ، و صحيت من حلم اليقظه و دى مش اول مر أحلم بحلم يقظة و يتحقق لناس تانيه المهم قررت أنى أعمل مدونة بس معملتهاش فى نفس الوقت .
المهم نرجع ليومى: بصيت على مدوناتهم وحسيت أد أه أنى متأخره أوى و طلع الموضوع بتاع المدونات من زمان أوى وقابلت تواريخ من 2005 وانا لسه سمعه عنه فى 2008 او يعنى فى اواخر 2007 بس كلامهم كان حلو وفى الوقت ده رن موبايلى وكان جوزى
الوووووووووووو
جوزى:عاملين اه
انا:الحمد لله زى كل يوم
جوزى: كويس فى مثل يبقول دوام الحال من المحال و مدام انتى حالك دايم دى حاجه كويسه جدا .
انا:ياسلام ظريف أوى
انا:وفى مثل بيقول( no news good news )
جوزى:تمام، المهم انا حبيت اطمن عليكم عايزين حاجه و أنا جاى
أنا: عايزين لبن،بطاطس مجمدةو حاجات السلطة
جوزى: ماشى ،باى
أنا: باى
و بعد بقفلنا مع بعض قلت لنفسى هو فعلا لما تكرر ألى بتعمله كل يوم وتعيش حياة روتينيه دى حاجه كويسة ؟ جوزى شايف ان دى حاجة كويسه طول ما أحنا بصحتنا و طول ما أبننا بخير و ربنا رزقنا بالمال الحلال ألى معيشنا عيشه كويسة و أن ناس تانية كتيرررررررر مش لأيه ربعه و لازم نقول الحمد لله .
بس انا مش سعيده انا عرفه ان ربنا اعطانى نعم كتيييييير بس برده انا مش سعيده وسألت نفسى أمتى اخر مرة كنت فيها سعيده ،وهى أه السعاده اصلا و هى شعور وقتى ولا ممكن يدوم كتيييييير وده ألى خلانى أداور فى النت عن معنى السعادة و تكعبلت فى حوار مع د. سليمان بن فهد العودة عن معنى السعاده حروح أشوف بيقول أه ورجعلكم.
سلام مؤقتا

هل حب اليابانيين لليابان يفوق حب المصريين لمصر؟

اصل كل الناس قالت فى تحليلها لتقدم اليابان ووصولها الى مصاف الدول المتقدمة بل و التفوق عليها فى بعض الصناعات بالرغم من الكارثة الحقيقية ألى تعرضتلها و انها ابشع كارثة ممكن تتعرض ليها اى دولة، طبعا عرفنها (القنبلة الذرية على هيروشيماو نجازاكى)

سنة 1945 . و كانت الخسائر فوق التصور حتى ان هى كانت فوق تصور ألى اخترعوا القنبلة الذرية وهى تدمير مناءا هيروشيما و نجازاكى الصناعيان و اغراق كل اساطيلها و معداتها الحربية مش كده وبس ده كمان تدمير 40%من مساحات مدنها ده غيرالناس ألى ماتوا وناس ألى اتشردوا و كانوا من غير مأوى .احنا ممكن نكون مش متصورين حجم الكارثة بس هى كانت ابشع كارثة بشرية.

خدنا الكلام عن الكارثة ونسيت أقولكم التحليل قال ايه ،قال ان سنة 1947 (انفجرت الطاقات الهائلة من تحت الرماد و بداية الدخول فى عالم الصناعة )هو المصريين مش عندهم طاقات تنفجر يلا المهم انهم بدأوا فى تطوير المجتمع وأول عمود فى اعمدة تطور المجتمع هو (وضع دستور جديد و خلوه ملكى دستورى يعنى الرجل الأول هو رئيس الوزراء الذى يتم أختياره من قبل الرلمان عرفين بقى الراجل ده يتولى الحكم أد أيه حد أدنى سنتين و حد أقصى 6 سنوات هنيالك يا لى فى بالى محدش اقدك بقالك معانا 26 سنه معانا انا مش بحسد و أهم حاجة فى الدستور بتعهم انه بيكفل

حماية حقوق الأنسان بس بجد مش كلام لأن من 47 لحد النهارده اليابان لا يشوبها شائبة فى موضوع حقوق الأنسان ،حكومة محترمة بجد مش زى ناس (الحدق يفهم) .

المهم انهم فى اقل من 50 سنه بقوا من الدول المتقدمة أصلهم بيحبوا بلدهم بجد اصل حب البلد ده مش معناه انى اسهر لحد الفجر رفعه الأعلام وبرقص عشان خدنا كأس أفريقيا وأغنى كام أغنيه فى حب البلد، حب البلد انى اتعلم صح وان كل واحد فينا يدى عمله حقه يخلص فيه بغض النظر عن المرتب ومش نقول أصل المرتب قليل أوى وهشتغل على قده ما تنسوش ان العمل عباده وانكم بتتعملوا مع ألى خلقكم مش مع حد تانى .
انا معرفش اليابانيين أحسن مننا في اه عندهم ادين وعنين ومخ وأحنا لأ ،ده أحنا كمان ظروفنا أحسن منهم بكتيييييييييييييييير هقول أزاى:
1-الطبيعة الجغرافية لليابان صعبة لأن 70%من مساحتها ألى تبلغ 377835كم2 غابات كمان ان معظم الجزر اليابانية تسيطر عليها الطبيعة الجبليةو كمان مشهورة بالبراكين و الزلازل اما الطبيعة الجرافية لمصر فكما كانوا بيدرسوا لنا زمان أنها مطمع لكل المستعمرين لموقعها الجرافى المتميز مش زى اليابان ألى
محدوفه فى اخر الدنيا( يا عينى عليهم) كمان المناخ بتعنا ممتاز مش زى عندهم .
2-تعرفوا ان اليابان بتستورد كل المواد الأولية تقريبا ومن ضمنها النفط و ارضهم مش غنية بالمعادن اما احنا بسم الله ماشاء الله أرضنا مليانة بالثروات المعدنية من حديد خام و فوسفات وبترول كمان.
3-مش الحكومة بتعتنا على طول رميه المسؤوليه على عدد السكان عرفين اليابان كام 125مليون وماكنش عددهم عقبة أمام التقدم و احنا بس 75مليون و مساحة ارضنا أكبر منهم و التى تبلغ مليون و الفين كم2 يلا شوية معلومات ببلاش.
ولو هنقول اننا كنا مشغولين فى التخلص من الأستعمار و الحروب ،هقول ان اخر حرب كانت 73 وانتصرنا فيها طيب من 73 ل 2008 يعنى 35سنه عملنا فيهم ايه يعنى المفروض دلوقتى نكون زى اليابان و كمان احسن بس الواقع للأسف غير كده يترى الفرق أد ايه ؟هقولكم بشوية معلومات:

1- عدد براءات الأختراع فى اليابان 300 الف فى السنه وعددهم فى مصر 24 فى السنه( والله هعيط).
2-الناتج القومى لليابان 4 ترليون و 600 مليار دولار غلابه يا عينى هتقولوا يعنى ايه ترليون هقول معرفش اصلنا طبعا مش بنشوف الوحده دى فى الحسابات المصريه بس هى طبعا اكبر من المليون و البليون و المليار. استعدواا عرفين الناتج القومى لمصر كام ألى فرحان بيه اوى وزير التنمية الاقتصاديه 845مليارجنيه حتى مش بالدولار .
3-متوسط دخل اليابانى 31 الف دولارفى السنه المصرى بقى على حسب كلام الخبير الاقتصادى حسن عبد الفضيل لا يتجاوز 800دولار فى السنه مع العلم ان متوسط الدخل فى الدول الفقيرة يتراوح بين 3-5 الاف دولار فى السنه يعنى احنا دولة معدومة.
انا عرفه انكم رميين الاسباب ألى وصلتنا للى احنا فيه على الحكومة وانا كمان بقول هى المسئولة بس لازم الأول كل واحد يعمل الى عليه و يخلص فى عمله و ربنا بعد كده هيكرمنا و يبعتلنا حاكم يتقى الله فينا.
و متنسوش ان سيد الخلق و المرسلين قال علينا خير جنود الارض مش جنود فى الحروب بس لأ احنا خير جنود فى اى حاجه ننوى نعملها بزمه، يا ريت نصحا بقى و نبطل هلس و فرجه على التليفزيون.

واخيرا

وأخيرا عملت مدونة بس مخبيش عليكم حسه أنى تايها موووووووووت وفي حاجات كثير مش عرفاها بس على كل حال بدايه كويسه بعد ما كنت بتكلم مع نفسى دلوقتى بقى فى أحتمال ان حد يسمعنى ويرد عليا ،طبعا أنا لازم اشكر مدونة بنت مصرية لان عن طريقها عرفت أزاى أعمل مدونة(شكراااااااااا ) وأتمنى أن اى حد بيفهم اوى فى الموضوع ده يساعدنى و يقولى أزاى أخليها مدونة نجحه .
أنا حبيت أقول ليه المدونة اسمها غربةعرفين ليه عشان انا مصريه عيشه فى السعوديه عرفين انا كنت زمان بستغرب اوى( اه مش من زمان اوى انا لسه صغيره ) لما اسمع ان الناس تفضل طول عمرها متغربه و سنه تجر سنه لحد لما تمر عشرة، عشرين،ثلاثين سنه و تبقى مصر بالنسبه لهم بلد بيقضوا فيها الاجازة وجاء عليه الدور عشان أكون زيهم انا بقالى أربع سنين و فيوم بسأل جوزى هنستقر فى مصر أمتى ألى لما الظروف تتحسن فى مصروتبقى الحالة الأقتصاديه زى ما هى فى الخليج هههههههههههههههههه ،صدقونى مفيش حد مرتاح الناس فى مصر بيعانوا من قلة الفلوس و غلاء المعيشه وانا هنا مش مستحمله البلد الى أنا عيشه فيها و عيشه اغلب الوقت مكتئبه طبعا مفيش أهل ولا أصحاب ولا خروج ممكن أكون 20 يوم فى البيت مشفتش شكل الشارع و يوم ما أخرج يبقى الى السوبرماركت بستنى الاجازة بفارغ الصبر عشان أروح مصر و أشوف اهلى و اصحابى،أد أيه الغربه صعبه خصوصا أن المكان ألى انا فيه فى السعوديه وحش أوى ومش قدره اتأقلم عليه على العموم هانت الأجازه قربت انا بنزل فى 6 و أقضى 3 شهور فى مصر وبعدين أرجع تانى لغذابى.انا عندى 25 سنه بس بعد 4 سنين غربه حسه ان عندى فوق ال30 سنه يعنى الغربه بضيف على سنين عمرك كثير مش عايزه اطول عليكم و اخر حاجه هقولها ياريت حد يزورنى ويقرأ ألى بكتبه و يرد عليا (ونبيييييييييييييييي).